Ovalandifi vomomapandaanda kEenhana, moshitopolwahoololo shaHangwena, ova pewa fiyo opexulilo lomwedi ou va tembukile konhele yokulandifila oyo ya tulwa po kelelodoolopa, shaashi elelodoolopa otali kendabala okuwilika oipindi yomomapandaanda.
Mayola wodoolopa yEenhana Omri Kavandje okwa ti etembu otali lalakanene okutula po onhele yokulandifila ya amenwa noi na elandulafano.
Eshi kwa li ta popi Omaandaxa pomutumba novalandifi, ta ti ovalandifi vahapu paife ohava landifile peenhele da puka, navamwe otava tula eengeshefa davo komesho yeefitola dovanhu, osho ta ti otashi piyaaneke ongeshefa yovanhu.
"Ovalandifi vamwe ova tula eengeshefa davo peenhele opo ve wete va panda inava pewa epitikilo kelelodoolopa.
Etembu otali ningwa she likolelela koveta yelelodoolopa notali lalakanene okuyandja eenhele da amenwa dokuningila eengeshefa kovalandifi," Kavandje ta ti.
Omukulunhuwiliki welelodoolopa Wodimbo Haulofu okwa ti elelodoolopa ola longekida eenhele nhatu opo tapa dulu okulandifila ovanhu ava.
Aa omatala okulandifila opo a tungwa komesho yoshipangelo mEenhana, omatala akulu nokEkolola.
Haulofu okwa ti elelodoolopa ola tameka okutula oinima peenhele li kwashilipaleke kutya ovalandifi ava ove na eenhele di li nawa oko tava tembulilwa manga inava tembulwa.
Ashike nee, omunashipundi wovalandifi vomomapandaanda Joseph Valombola okwa ti itava kondjifa etembu, ashike ova hala elelodoolopa tete li yambule po eenhele oko tava twalwa ndee tali tula po omilandu dokuyambidida eengeshefa davo.
"Katu li ominge netembu.
Ohatu pula elelodoolopa li ninge omalongekido opamufika manga inali tu tembula," Valombola ta ti.
